វេទិការសាធារណៈរបស់ក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត សង្កាត់អូរជ្រៅ ...!

(បន្ទាយមានជ័យ): នៅព្រឹកថ្ងៃព្រហស្បតិ៍ ទី០១ ខែសីហា ឆ្នាំ២០២៤ លោកឧត្តមសេនីយ៍ត្រី ស៊ុន សម្បត្តិ មេបញ្ជាការរងកងរាជអាវុធហត្ថខេត្ត តំណាងលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ អនុប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត និងជាប្រធានក្រុមការងារចុះមូលដ្ឋានសង្កាត់អូរជ្រៅ អញ្ជើញជាអធិបតីភាព វេទិការសាធារណៈរបស់ក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត សង្កាត់អូរជ្រៅ ដោយមានការអញ្ជេីញចូលរួមពីលោក-លោកស្រី ក្រុមការងារចុះមូលដ្ឋាន លោកចៅសង្កាត់ រួមនឹងបងប្អូនប្រជាពលរដ្ឋចូលរួមសរុបចំនួន២២៩នាក់ ដែលប្រារព្ធធ្វើឡើងនៅភោជនីយដ្ឋាន ប៊ូ សោភ័ណ ក្រុងប៉ោយប៉ែត។

មានប្រសាសន៍នាឱកាសនោះ លោកឧត្តមសេនីយ៍ត្រី ស៊ុន សម្បត្តិ ក្រុមការងាររាជរដ្ឋាភិបាល អនុប្រធានក្រុមការងារចុះមូលដ្ឋានសង្កាត់អូរជ្រៅ បានបញ្ជាក់ថា ការរៀបចំវេទិកាសាធារណៈជាមួយប្រជាពលរដ្ឋនៅតាមមូលដ្ឋានមានគោលបំណង និងសំណូមពរ សំខាន់ៗ៣រួមមាន៖ ១-លើកកម្ពស់ការផ្សារភ្ជាប់ទំនាក់ទំនងរវាងប្រជាពលរដ្ឋជាមួយរាជរដ្ឋាភិបាល តាមរយៈសកម្មភាពរបស់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ក្នុងការជួបប្រាស្រ័យដោយផ្ទាល់ជាមួយប្រជាពលរដ្ឋ គ្រប់មជ្ឈដ្ឋាន ដើម្បីស្វែងយល់អំពីជីវភាពរស់នៅ និងស្តាប់នូវកង្វល់ សំណើរ សំណូមពរ និងបញ្ហាប្រឈមនានានៅតាមមូលដ្ឋាន។ ២-ផ្សព្វផ្សាយអំពីកម្មវិធីនយោបាយយុទ្ធសាស្ត្របញ្ចកោណ និងសមិទ្ធផលនានារបស់រាជរដ្ឋាភិបាលជូនប្រជាពលរដ្ឋបានជ្រាប និងស្វែងរកការគាំទ្រនិងការចូលរួមអនុវត្ត។ ៣-ដោះស្រាយ និងបូកសរុបសំណើរ សំណូមពរ បញ្ហាប្រឈមនានានៅមូលដ្ឋានដើម្បីកំណត់អំពីវិធានការដោះស្រាយឆ្លើយតបនឹងតម្រូវការរបស់ប្រជាពលរដ្ឋ។

ជាមួយគ្នានោះលោកក៏បានអំពាវនាវឱ្យបងប្អូនប្រជាពលរដ្ឋដែលបានចូលរួម សូមលើកឡើងនូវបញ្ហាប្រឈមនានា ដែលបងប្អូនប្រជាពលរដ្ឋបានជួបបញ្ហានៅមូលដ្ឋាន ដើម្បីធ្វើការលេីកយកមកដោះស្រាយនៅចំពោះមុខ។ តែបើក្នុងករណីដោះស្រាយចំពោះមុខមិនបាន ក្រុមការងារនិងលេីកនូវសំណេីរ សំណូមពររបស់បងប្អូនប្រជាពលរដ្ឋ ជូនដល់ថ្នាក់ដឹកនាំដើម្បីប្រជុំធ្វើការដោះស្រាយបន្ត៕